早幾日老友茶聚，老友A之太座問到，點解May姐搞到脫歐左支右絀，好明顯佢太座一定冇睇本欄。我一早講，成件事係May姐之黨內對手想千方百計迫走May 姐，於是就利用脫歐呢件事，來迫走May姐。當然，May姐會覺得，上次你班友想迫宮，點知人數唔夠就失敗咗，依家就用大是大非的脫歐事件夾佢走，可惡也。於是，大家相持不下。嗱嗱嗱：反May姐陣營之主力反歐派，又唔夠人隊走May姐，而支持May姐嗰啲，又唔夠人通過May姐之脫歐方案，於是戰情膠著。
英首相文翠珊
咁要搞幾耐？當然要睇究竟親May姐同反May姐出唔出到招KO對手。親May姐陣營出怪招，走去搵工黨傾個跨黨派嘅刁，只要搞定，就可以打殘脫歐派。老實，反正下次大選保守黨輸硬，但從May姐角度睇，脫歐事務係佢個人之歷史定位，點都要做好佢。外界口痕友話：保守黨咁樣落去會分裂呀？點算呀？我估佢地都未必知，英國政黨內部四分五裂係常態，而且，搞第三力量之政黨，響英國通常會失敗收場。
難得May姐已經忙到一頭煙，居然佢地政府官員仲有時間去回應「送中」條例。但係，英國佬依家實力，已經唔同1984年，仲已經同五十年前唔同晒，佢地點樣講，都唔會對香江局勢有任何幫助，佢地只不過跟隨美帝的腳步而已。美帝對港事務之睇法，亦都係要睇美中關係。我之前有講過，美帝有趨勢，將香江同美帝之關係，逐步脫離美中關係之框架。呢下唔係講笑。
美帝上月邀請陳太等人去美帝輪番見面，仲見埋副總統彭斯，好明顯係一種拉力。你估白宮官員又或者彭斯好得閒，乜嘢人都見面咩？你睇上次台北市長柯P飛去美帝，希望番邦會有官員講下撐場之說話，點知一個官員都見唔到。依家Korean Fish去咗美帝，直情連華盛頓行程都安排唔到。當然，有韓粉支持者話，係Korean Fish自己唔去華府，搞到美帝官員好失望。老實，如果華府有官員想見Korean Fish，紐約呀、波士頓都得啦。今次好明顯係美帝，暫時為止，唔endorse柯P同埋Korean Fish啦。美帝立場好清楚了，唔好當寶島選民係傻瓜也。
咁點樣去觀察華府下一步行動呢？有兩點。第一，就係美帝會唔會再發英雄帖，邀請民主派人士訪美。因為如果有訪美之行，美帝相關部門就會畀一個規格，睇下會有乜嘢官員會出席。咁樣就係顯示佢地有幾重視訪美之民主派人士。香江人士素來對規格嘅事一知半解，但如果規格夠高，美帝盟友會醒水，北方強國會震怒也。第二，就係香江人士會提乜嘢方案畀美帝，去處理香江面對的自由民主人權受到壓迫之情況。如果民主派提出一些方案，而美方又接受的話，咁美帝國務院及國會就隨時有所行動。遲啲有嘢睇了。
倫敦大學亞非研究學院法律系博士