扭開台灣網絡電視，成日聽到兩個名。一係卓榮泰，另外係Korean Fish韓國瑜。前者你唔識？唔緊要，好快佢就會畀北方大國傳媒鬧到開巷，因為佢已經報咗名參選民進黨主席。話說敗選之後，English Choi辭去黨主席。有人問係未陳其邁接任，點知臨尾就有幾個中生代，一齊支持卓榮泰出來做主席，傳聞背後English Choi操作喎。
英國首相文翠珊
難怪仲有人鬧English Choi，呢頭辭去黨主席，嗰頭就幕後指揮大局，呢個綠營真係冇眼睇。至於Korean Fish呢？埋班埋到去搵朱立倫度攞人去做副市長，於是口痕友話，日後Korean Fish會支持立倫去選總統云云。點都好，依家藍營有機會下屆翻盤，個個都借Korean Fish個氣勢去卡位做總統候選人。依家立倫vs 敦義，你撐邊位？
美帝呢？侵侵總統日日都鬧人，今次鬧邊位？佢鬧人唔係新聞，但今次佢要鬧聯儲局。冇計啦，侵侵想搞好經濟(話之你經濟過熱)，迎接連任之戰，咁加息就真係會窒住度氣。你又好難怪侵侵咁大火氣，因為佢嘅前國家安全顧問弗林，被告上法庭，因為佢為了護主響FBI 面前作假口供。
冇嘢嘅，通俄門一路咁樣玩落去，一直燒住侵侵條尾巴，都真係幾煩。所以侵侵都要搵人出氣，揾完北方強國鬧完一輪之後，前日仲話要響敘利亞撤軍，轉移視線，讓大家都去關心中東火藥庫。又話中美雙方會積極去傾貿易協議？問題係，侵侵會唔會到了臨門一腳，為咗自己選情，響最後一刻反檯呢？搞到世界大亂先呢？真係耐人尋味。
英國May姐慘啲，因為佢貴為首相，既先畀國會議員迫宮。後來雖然有一半以上之保守黨國會議員支持佢就過關，但就元氣大傷啦。May 姐保住首相之後即刻去歐洲斡旋脫歐方案，仲畀歐洲佬鬧到一面屁。工黨之彬叔準備用不信任動議，迫保守黨國會議員公開佢地係咪支持May姐，呢招都幾毒。因為上次保守黨迫宮會議，邊啲國會議員撐May姐，邊啲最後冇撐佢，因為係秘密投票，冇人知。彬叔呢招係要迫呢班反May戰士公開其立場，咁保守黨國會議員會唔會上彬叔呢個戰車呢？講到呢度，好似冇提到硬、軟脫歐此國家大事。查實英帝政治都係搵食掛帥，政界要搵食就係做首相。彬叔雖然都關心退歐，但最關心仍然係幾時要出手，迫首相提早大選。有人提二次公投？唔係嘛，萬一親歐派再輸又點算呢？
回到香江，總理見好打得，提到香港單獨關稅區，畀好打得好大壓力。喂阿哥，香江大黨，建制泛民都去美帝講talk遊說，連建制大老上周四都撰文轉軚支持泛民去美帝遊說，依家剩番好打得未訪問美帝，都幾頭痕。明年如果香港響單獨關稅區地位畀美帝搞，好打得真係食到應。唔怪得阿姐一聽到美帝即時黑面。你話呢？ 倫敦大學亞非研究學院法律系博士