英首相文翠珊
上周本文出街之時，英帝May姐下午就公布唔撈。估唔到做夠三年就走，算係短命首相。查實即使唔係脫歐協議唔通過之問題，單係歐洲議會輸到開巷，佢都要請辭。歐洲議會選舉睇到，保守黨嘅支持者，對脫歐一事係相當上心。佢地好想脫歐。既然保守黨領袖無能，選民就走去支持脫歐的悍將奶嘴哥(Nigel Farage)。
咁就解釋咗點解波叔(Boris Johnson)依家係接替May姐的大熱，因為波叔出名神經刀，當然唔係侵侵嗰種發癲，而係佢講嘢、工作、創意，仲有把衰口，係相當適合依家保守黨班選民之口味。波叔同佢地之支持者，一直認為冇「刁」勝有「刁」，硬脫歐都在所不惜。呢件波叔之口味，保守黨選民完全受落。賭波公司之貼士素來係準，佢地的賠率方面，都係波叔排第一。如果真係波叔做首相，嗰包花生麻煩大包啲，包保日日有笑料。
波叔咁古怪，選佢做首相，一定同對岸嘅另一件侵侵好好傾矣。侵侵依家最緊張連任，國內事務其實唔使同佢擔心，佢之抹黑力及無賴力，已經去到最高境界。民主黨想用彈劾之方式（即係侵侵之通俄門事件），迫侵侵落台，但睇來都係得個吹字。所以紐約時報就開始發揮佢地之抹黑力，爆料話侵侵之國安顧問鬍鬚佬博爾頓，最近有兩單嘢同侵侵意見相左。一單係對伊朗態度，因為鬍鬚佬想推翻政府，但係侵侵公開話唔想。另一單係對北韓金肥仔射飛彈單嘢，鬍鬚佬想講北韓違反聯合國決議，但侵侵就否決咗。
睇得美劇政治故仔，都知總統之性格決定一切。侵侵做嘢，直覺行先，吹無定向風，樣樣有佢之盤算，但佢又唔會樣樣都同幕僚分享，所以究竟邊個係佢身邊紅人，可能連侵侵都唔清楚。但侵侵一如以前之總統，都會響幕僚容納唔同意見之人士，鬍鬚佬就一定係最鷹嗰個。我地呢啲外人，要估侵侵下一步點走，最好都仲係要睇鬍鬚佬，因為佢近期成日搞緊中東，特別係伊朗。搞完伊朗，鬍鬚佬會唔會去搞東亞國家呢？
而東亞國家之最新動向，係究竟下年台灣總統選舉邊個會贏。前日星期三，民進黨中執會終於通過初選方案。詳情大家睇報道啦，總之就係對比式民調之外，再加市內電話及手機民調各一半。咁樣係未公平？你睇下賴神之支持者，響黨總部外面示威震天，仲有賴神陣營之中執會成員，響開會期間拍檯拍凳就知啦。因為依家形勢唔同晒，賴神之威勢唔夠English Choi犀利。老實，一個人拿住總統大位，行政資源可謂無窮，另一個係已經下台之行政院院長，實力不相稱。假如初選係響三月搞，賴神仲有機會打瓜English Choi，但依家呢，well，留意綠營之派系動員支持邊個啦，中執會結果畀晒答案了。