原來，寫這個專欄已五年多，我真很難想像自己可以寫足5年，畢竟對於大眾來說我只是一個有皮膚癌而又好像很樂天活下去的患者。
《am730》找我寫這專欄的時候，我曾猶豫應否自暴其短，始終冇乜點讀過書，盲字唔識多隻，話晒寫得報紙專欄，個個唔係思路清晰文筆流暢，就必定係在社會上有點名氣，當然你有錢嘅大可搞份報紙出嚟日日寫專欄都仲得，不過我只係寫過遺書辦過喪禮，嗰陣覺得獻醜不如藏拙，最終幸得素黑鼓勵及覺得人家找你係因為覺得你有價值，本著幫得就幫嘅心態之下才答應。
我以為寫專欄係可以隨心所欲，想寫乜就寫乜。唔係話報館有任何限制，他們好好，從來都冇限制我寫啲乜，即使係所謂嘅白話文，他們都沒有任何意見。只係啱啱寫專欄嘅時候，我係希望可以透過專欄去表達我對生命對死亡的價值觀及對社會嘅睇法，以為透過新聞媒體就可以一路陪伴讀者面對壓力及改善他們的生活質素(我知呢個想法好天真好傻)但慢慢卻被新聞牽著走，每星期的專欄都忍不住要回應最新鮮出現的社會問題，最後只變成一個追蹤社會新聞的follower。
每星期寫專欄之前，我都會先看一次過去一星期的所有報紙新聞及專欄，老實說，這樣也造成自己生活上很大壓力，每一次寫專欄的前一晚我都必定心緒不寧。我試過預早把專欄寫好，但當截稿前一刻再看看新聞最新發展，最後又忍不住重新再寫過。
現今香港，幾乎每一日都有不同的問題出現，一篇幾百字的文章你可以表達到幾多，又有幾多人嘅生命真係會因為你呢幾百字而作出實質改變。而家寫專欄，只會讓認同你的人更認同你，讓否定你的人更否定你而已。
但當然！寫專欄也給我很多得著，例給我常常收到讀者的回應包括鬧我及讚我的，我都一樣喜歡，因為你們都願意跟我展開對話，這對我來說相當重要。
好喇，版位好貴字數有限，最後想講嘅係，一個會考零分、中學未畢業嘅人都可以寫專欄寫咁耐，也因為我都相信自己有值得欣賞嘅地方。
記住，我得，你未必得。同樣，你得嘅，我都未必得。所以我哋忠於自己所相信嘅嘢就夠。有緣再會，江湖再見。(其實下星期先係最後一篇，不過早少少講，等你等我都容易接受。)