香港人又有嘢排喇！今次係來自北海道嘅一幻。傳說中每個飛新千歲機場嘅港人都會食番嘅一幻拉麵，終於嚟到香港！選址灣仔，地點方便但座位唔算太多，要食就預咗排一個半鐘起跳。咁多人追捧係因為個湯底每日都用60斤甜蝦蝦頭熬製而成，加上蝦味麵酥同用蝦頭磨碎炒香嘅蝦粉，試問碗湯又點會唔鮮甜呢？濃郁嘅湯底加上彈牙掛湯嘅麵條，絕對令人忍唔住食晒兼飲埋碗湯！(但真係好飽，飽到我忍唔住由灣仔行去中環散住步嚟消化)
拉麵店雖然仲有蝦味飯糰同叉燒飯滿足各位「飯桶」，但我始終都係認為個拉麵比較出色！至少我會為咗佢再去排多一次隊！
一幻拉麵香港店
灣仔皇后大道東119號B店 (船街交界)