京都之旅｜🦆🍜emoji鴨肉拉麵店Gion Duck Noodles中伏記🚁🚁🚁

上一篇日本一の鰻「京極かねよ」鰻魚中伏記喺今年二月刊登，相隔大半年【其の弐】終於登場，點解隔咁耐？不中伏，哪有稿啊？最近再遊京都，四条河原町與祇園一帶係每次必到之地，亦係我其中一個搵食熱點。一間喺祗園巷弄內，憑住店名同菜單只有一隻鴨與拉麵emoji的鴨肉拉麵店Gion Duck Noodles，輕鬆地在網絡與IG吸引我注意，成為今次目標之一，點知……我金翅又中伏鳥……

京都之旅｜🦆🍜emoji鴨肉拉麵店Gion Duck Noodles

一向對排隊極抗拒的我，睇到窄巷裡的人龍竟然沒有掉頭走，神推鬼㧬乖乖地排隊。店員隨後逐一向排隊人士派發及講解菜單，🦆🍜 =鴨肉拉麵，🦆🍒=鴨肉沾麵配莓醬，🦆🍊=鴨肉沾麵配蜜柑醬。一向對沾麵極抗拒的我，神推鬼㧬揀咗🦆🍊。
一連串神推鬼㧬後終於入座，睇到吧台放住幾個虹吸式咖啡壺處理湯頭，貫徹玩嘢作風，至於有咩作用得佢先知。沾麵上桌，有數片鴨胸肉叉燒，入口頗嫩，生熟度不俗，粗麵條有嚼勁，據稱係用咗德國黑麥全麥製作，主廚仲有法國料理經驗，咁嘅組合跟本冇得輸；可惜沾麵帶點冷麵風格，其他食材亦全部唔熱，就連沾麵的沾汁本身都唔夠熱，放入沾麵來回食兩啖，連沾汁僅餘嘅溫度都冇埋。食完麵，叫店員再加清湯(湯割)，都！係！唔！夠！熱！成件事變得淡而無味，溫度失衡。其實日本好多食沾麵店都採用冷麵風格，配料同沾汁溫度上非常講究絕不馬虎，湯汁甚至用石鍋保持熱度，Gion Duck Noodles喺溫度處理上亟待改善。不過，出面條人龍由早到晚都咁長，收錢收到手軟，仲改嚟做乜。記住IG害人，影響一生。