近幾年睇睇埋埋咁多超級英雄電影，究竟給我們帶來甚麼教訓？我自然不知道你哋點諗，而我，的確因為呢班不得不正義的人，明白了一點點。
我們總曾幻想過自己是天降大任的超級英雄。你冇？OK Fine。
小時候的我，最渴望自己是蜘蛛俠：1.我鍾意佢套藍撞紅貼身戰衣；2.我鍾意佢噴出的蜘蛛絲，原因不明；3.佢好似比起大部分超級英雄都聰明啲招積啲。
長大後，才發現他比好多人窮。窮，當然不影響他的超級能力，也不妨礙他行俠仗義，只是做一個要為口奔馳受老闆氣的超級英雄，點講，都同自己過唔去。
畢竟我們生存在一個高度資本主義社會。在高度資本主義社會生存的關鍵，就是擁有高度資本。
所以我忘記初衷，變得好恨做蝙蝠俠。
就以《BVS》為例，你幾時見過Bruce Wayne需要返工？他甚至唔使返Office巡視業務簽文件(他唯一一次衝返去Office是為了救人，實在太超現實)？Bruce日常需要做的，就是諗計對付超人，而又難得在他有一個好管家，幫他落手落腳仆心仆命處理生活上各項事宜，好讓他集中精神與精力，扮演超級英雄。
到了《Justice League》，他比較多嘢煩，煩是因為無奈，無奈在於他洞悉到一股自己應付不來的外星惡勢力準備侵襲地球，獨來獨往的他不得不搵人幫拖——搵一些能力比他強的人幫拖。
問題來了，你話搵人啫，人哋卻未必肯聽你支笛——即使肯Join，也需要時間磨合——Yes，就像我們返工被迫跟非親非故的同事合作時，一樣需要磨合，而更多時只會發生你唔妥我我唔妥你的㷫烚烚。
電影不代表現實，所以一班超級英雄話咁快就能放開彼此心中矛盾，而這可能跟各人能力職份不重疊有關。
閃電俠，典型初生之犢，有衝勁，缺實戰經驗；他深明自己問題，不嫌其他比佢年紀大的人是廢老，肯學肯捱肯蝕底。呢類人，請得過。鋼骨，踏實IT男(不排除有人會叫佢做IT狗)，所有IT嘢都可以獨力搞掂，只是他個性偏向沉鬱，好需要別人的體諒與關懷。
(每次出場都慌死冇人知的)水行俠，不羈野性獨行獨斷，懶理規矩與別人感受，OK不合群……基本上，任何公司總有一兩個呢亭人，要搞掂呢亭人，離不開一個Woman——在電影裡是Wonder Woman，而現實中，你肯定請唔到咁Wonder的人，但唔該都搵個OK美艷動人的Woman坐鎮。這麼一個Woman，除了令工作環境冇咁齋，也起著凝聚(麻甩佬的)作用。
Well，咁蝙蝠俠做乜？他有錢，他亦知道自己唯一能力就是有錢，但基於面對的是外星人而不是地球人(錢只能收買賄賂地球人)，加上外星人又Keep住飛嚟飛去，以致他只能在場邊做助攻執吓雞，Final Boss呢？留給能力比他強勁的隊員處理好了。但蝙蝠俠廢嗎？又不是，若當初沒有他出面集合其他人組成一條Team，就大鑊了。《Justice League》讓我看到Teamwork的重要，英雄固然無法獨自拯救世界，凡人如我們，也不能獨自做晒公司啲嘢(但這個真理不是塵世間所有僱主都明白)。
而一個勢孤力弱小學生也不能獨自面對和處理欺凌，偏偏一班責無旁貸的大人卻希望化整為零。
渴望超人打救固然是癡想，估唔到連要求大人做回大人應做的事也是妄想。