做咗車仔球迷二十幾年，最鍾意都係曉士年代，隊波爛爛地，又一定唔會拿冠軍，咁樣至符合我負能量之生活風格。依家呢？教練車如輪轉，冇冠軍就要out。今次教頭沙利(圖)好頭痕，佢之「沙利足球」，簡單來講就係一個「三角形」。我唔識睇波，只識球場爆粗，但沙利之三角「型」，又要球員擺三角形傳波又要好有型，係要時間來學習及訓練。不過，依家呢個時勢，個個都即食，老細點會畀你時間教波？究竟沙利係追求完美、為達目標而堅持到底的理想主義者，定係一個固執阿伯堅持陣式寧輸不破堅守「三角形」之煙鏟？球迷依家鏟到佢上天花板，沙利係未真係要轉陣式呢？
所以呢，做一哥做一姐，冇民望，點得啫？咪以為好打得唔希罕，喂阿哥，佢依家響連任分界線之中徘徊，一個唔覺意跌破分界線就真係做多兩年就要交棒。要拿民望，就唔好學沙士咁寧噓不屈，死不認錯，要錯都係球迷錯市民錯。當然，好打得砌高爾夫球場，未必有分加，因為好多人都預咗佢會咁做。但更殺傷力大嘅，應該係引渡單嘢。老友A年屆六十，成班朋友都係退休人士，淺藍為主，順民一生，即係點都唔會上街，想安定過日辰。依家整個引渡修法，老友A話連佢啲樂齡淺藍都媽媽聲。泛民一早響議會冇晒力，政府建制一體照理真係風光如畫，但今鋪連淺藍都覺得過火，似乎唔係波噃。
所以，一個人只係靠點小聰明，靠自身殺上去冇朋友幫手之領袖，好快如履薄冰，隨時陣亡。英帝May姐之退歐方案，隨時凍過水，都係因為冇盟友。工黨有一班中間派都頂唔順兩黨之退歐操作，先退黨做獨立議員，保守黨之中間派又走幾件，走下走下，May姐之多數議席只剩低幾席，真係風雨飄搖。有花生友話，與其搞到國會開會咁難睇，會唔會提前大選攞番個新民意，然後再去搞退聯呢？如果係咁，May姐之退聯大件，唔推遲都唔得。推遲保平安嘛？係未？
我地日日都咁樣睇中美貿易談判，以為呢件事係世界中心，成個美帝圍住呢件事轉，好似幾百年前，人類以為太陽係圍住地球轉一樣。睇美帝各大媒體，中美貿易戰真係低中之低，唔重要之極，因為侵侵炮火係對付緊民主黨。美帝民主黨派邊件出嚟選，佢就先至部署定一個反制方案去贏連任戰。有人話，中美拖延談判，對侵不利。其實侵侵係睇住食。如果到時民主黨整件溫和反中嘅，侵侵就自然企響道德高地打中國牌，真係鬧翻都仲得。如果係反中嘅，佢隨時可變為溫和，又或者更反中，視乎需要啦。
咁美帝關心啲乜嘢？侵侵之右手博爾頓的推特，近期一日幾個帖，都係委內瑞拉。明白未？