兩年幾前，侵侵仲係美帝政界的笑柄。好多人話佢唔decent，講嘢粗鄙，人品唔好，質地又差，行事魯莽，係共和黨之末流。當時共和黨都估佢會收工，仲思考點樣響四年後捲土重來。點知侵侵真係勁，佢就係響邊緣掙扎，居然險勝希拉莉贏得總統大位。
物轉星移，佢上台近兩年，人事風波不斷，日日都有新招，天天都有醜聞，同主流媒體日日開戰，又唔同共和黨內的主流派和好，好多人批佢好快會下台。結果呢，佢又好似輕舟已過萬重山，好快就已經做咗好多嚇怕國際社會之事，特別係，同北方強國開火，以貿易戰名義向北方強國極限施壓。你會問：有用咩？我唔識點樣答，但呢個世界有街頭智慧。閣下不妨留意一下，每日響各街頭的人仔買入同賣出價。無錯，依家人仔買入同賣出價的差距闊咗，人仔係跌緊。點解人仔會跌？又點解有咁多找換店？依家個個都走資，響上面拿人仔現錢來香江換港紙美金散水啦。咁又點解咁多找換店呢？生意嘛，依家換錢換得多，又要登記身份證明文件呢樣嗰樣，當然唔係間間揸正來做。但如果真係人仔cash多，咁就勤力啲，拆散去幾間找換店換港紙囉，easy。
呢啲題外話啦，但係侵侵呢兩年似乎響外交有力咗，同伊朗及北方強國開火唔留手。但大家記住，美帝人民都唔係咁理外交，佢地比較關心內政。咁就要睇下佢內政有乜嘢建樹啦。一句好重要：前人種樹後人乘涼，之前奧巴馬搞嘅量寬，真係幫到美帝經濟走出谷底，侵侵上台真係受惠晒，依家經濟好番好多，失業率又低，加埋佢又減稅，人民手上嘅錢多咗啲，呢樣嘢亦係佢優勢之一。依家係，支持侵侵嗰啲極右忠心fans，同埋一班好唔鍾意體制之選民加加埋埋一齊，齊齊將社會扭向極右。今次中期選舉結果睇到，好多侵侵fans都冇走咗，並唔係好似自由派媒體講，好多人後悔當初選咗侵侵做總統。依家中期選舉結果睇到，侵侵參議院繼續領軍，眾議院只係輸些少。環境如此，唔怪得侵侵講，選戰取得巨大成功啦！
所以大家唔好太快以為，因為侵侵失去國會眾議院之多數，有機會響貿易問題上冇咁強硬。佢一定唔會，因為一來侵侵響眾議院只係輸些少，對大局影響不大，況且美帝之政黨係鬆散型為主，國會議員有時候未必需要跟政黨之大隊表態及做事，於是民主黨贏多幾十席都好，未必可以有力次次左右大局。而且，侵侵係需要響下年，用盡全力去搞連任之競選工程，所以佢點都要交多些少政績至得。因此，我地應該要關心，下年侵侵會唔會為咗將政績盡快搞上去，於是將嗰啲已經極辣，對外之「極限施壓」之操作，一於再加辣，問你怕未？