多謝各位讀者支持。近一年來工作越來越多，晚晚做到癲晒。所以，都係要減少其他工作。本欄從今次開始，都係隔周出街。我其他專欄都係咁樣。冇所謂啦，年過半百，唔好成日霸住個茅廁唔拉屎，係咪？
言歸正傳。美帝幾時講decoupling呢？侵侵上個月十四號響一個訪問之中話，美帝同北方大國完全斷絕關係，原話係：You’d save $500 billion if you cut off the whole relationship，即係話，侵侵唔介意去同中國斬纜，因為咁樣可以慳返五千億美元。原來大家以為侵侵吹水，依家睇落去，佢係唔似講笑。
侵侵講之時，剛好係北方大人搞兩會，大家覺得佢隨口講，唔當一回事。同北方大國斬纜，唔係一件新鮮嘅說法，因為十幾二十年前，有一班美帝右派人士都響度咁樣講。但係當經濟全球化，各國都互相依賴，你中有我，我中有你，點可能呢？但係，呢個說法，響依家疫情發展之中可以睇到，全球都欠口罩，全球都欠醫療物資，個個發現，已經唔可以靠某一個地方嘅產品，咁侵侵都係一樣。
侵侵團隊就趁呢次機會，思考點樣同北方大國嘅關係。呢個幾月，有乜嘢斬纜行動呢？舉例啦，股票市場將北方大國嘅公司趕出去，某些同軍方有關嘅美帝留學生又趕走，又叫北方大國通訊社響美帝要登記做外國代理人等等。依家係一步一步將同北方大國嘅商業切斷，然後連文化交流都切埋。
原本都係侵侵吹出來的東西，大家都唔信，依家似乎係玩真嘅。去到英帝，大家原本都唔信波叔會敢玩切割，似乎都係真事。波叔病好之後，成個大勢唔同晒。波叔大病之前，裡面嘅主流意見，都係唔好同北方大國做經濟切割。但波叔病好之後，情況已經唔同咗。最近大家睇到，波叔上星期決定，要所有5G發展，將「威威」排除出去。北京有乜嘢反制？上周六，英帝有報章爆，獅子銀行寫信俾波叔，話英帝取消「威威」5G，佢地生意面對好大壓力。上周日呢，又有英帝報章爆，北方大國話，唔俾「威威」5G響英帝市場，佢地唔會再投資英帝嘅高鐵同埋核電廠。早幾日，北方大國外長同英帝外相傾電話，都係有好大分歧。如果冇估錯，英帝係同美帝一樣要decoupling。你估北方大國驚BNO同埋獅子銀行唔支持立法？錯矣。十個BNO，八個窮到燶，北方大國驚你走咩？走得去邊？
當美英雙帝要decoupling的話，下一波焦點就係睇，究竟其他國家係咪要跟。太陽國呢，安倍為勢所迫，國內反中，加上美帝壓力，仲有就係國安法嘅衝擊，令到日僑擔心住響香江的安危(有單北海道大學事件，大家可以去google搵下)，咁太陽國都要表態，加入美英行列。暫時睇唔到太陽國有decoupling嘅壓力，但係依家美英雙帝咁樣捽落去，唔知安倍可以頂到幾耐。
倫敦大學亞非研究學院法律系博士