仲記得上年喺中環Zuma試咗F1和牛，之後就一直念念不忘，好想再食番。佢嘅油花比一般和牛少，而且肉味香濃，食咗第一啖已經有一種：嘩！好唔捨得食晒佢嘅感覺！可惜當時只係做限定menu，已經冇再推出喇！(絕望)
最近去過日本高山，當然要食番當地最出名嘅飛驒和牛啦！亂打亂撞入咗一間專係食燒烤黃牛嘅專門店，見佢有JA嘜頭，係日本政府認可嘅國產牛，即刻衝入去mark個靚位先啦(排隊入座係自行填名同人數等佢嗌)！6點鐘都未夠就已經開始要排隊喇！排隊嘅人有一半係日本人，一半係遊客。等咗1個鐘左右就入得，點知入到去，弊喇！乜咁多香港人嘅！心諗：會唔會係遊客餐廳嚟㗎！不過，等咗咁耐，點都要試吓嘅。我叫咗一客有齊飛驒牛同飛驒豬嘅拼盤(5,080円)，將飛驒牛放上煎板嗰一刻，已經聞到好香嘅牛味，油脂分布均勻，一入口更加不得了，juicy得嚟肉味香濃，油脂平均，肉質細緻，好味程度已經超越咗F1！由食第一塊開始，已經忍唔住同助手常威講：弊喇！返到香港食唔到點算好！
喂！你話點算好啊？
味藏天國燒肉
地址：岐阜県高山市花里4-147 電話：0577-37-1129