有得揀/有得簡
唔覺唔覺2023年，其實我已經40歲，阿叔我由細到大都好喜歡想當年，有時候睇到「香港舊照片」就好迷，會幻想自己如果回到過去，從新活在上個年代又如何。同時又因為我剛剛40歲，不知道是否身體有所變化，我竟然開始時不時思考人生為何。
快樂是甚麼？幸福是甚麼？我們大部分人都不是李嘉誠，不是Charlie Munger，不是Warren Buffett，似乎我們都不會上班上到八九十歲，一輩子收入大於支出，所以人生最後的階段，好多人應該就是一點一滴消耗自己前半生所賺回來的，看著辦，看著使。因此，減少慾望和支出，就是其中一個讓自己不會「臨老唔過得世」的法則。一年食一兩餐特別好的，不用每個月都找米芝蓮吧；能走路就到達的地方，就不揸車；地鐵方便的地方，也不Uber；衣櫃內的衫原來夠你穿5年，下次轉季就不用買新了……簡單生活，多菜少肉，正向思維，降低自己的物質要求，讓自己不再追逐無涯的消費主義，是不是就能快樂？
我覺得並不是。幸福其實是——要有得揀。如果你可以有得揀，簡單生活還是輕輕奢侈一下，原來你夠錢坐Uber但你話「不如今日我哋當做運動，行半個鐘過去啦」，條路係你自己揀，你腳跛都唔會喊；但如果你一窮二白，你只能走路過去省點錢，走同一條路你的心情和看法都不一樣。
有些富足的人戴Casio和Citizen，是他們選擇了自己戴甚麼，而不是他們只戴得起膠錶，心境完全不同。許冠傑82年唱：「快樂~是陽光普照的清晨~」你試下同「以巴衝突」中的居民講「不如你試下唔好望住啲頹垣敗瓦，抬起個頭，望下個藍天吖，啲陽光幾燦爛！係咪好快樂呢？」我怕你會被哈馬斯捉去折磨。人類就是有得揀，有床竟然唔瞓，有涉谷的街唔行，竟然走去登富士山，個個嗌生嗌死，因為我們不是被迫的，而是自己揀去行的；行完仲好有成功感，仲寫落專欄，以為自己好叻。
我們都是香港人，為甚麼有班人近年好像幸福欠缺，苦埋口面，就是因為他們覺得自己冇得揀。姜B定光B，流行榜選舉有得揀先至係老闆。如果表面有得揀，其實冇得揀，大家亦懶得揀，又或者，他們的選擇就是「唔揀」，姜B定光B都唔投，仲未犯法嘛？