大前日叫個外賣早餐，你話趕返工無時間買，我好心俾件多士你，你話怕熱氣，要食我兜腿蛋通，又話好耐無飲奶茶，問都冇問多句就攞埋，叫我㩒汽水機買維他奶飲。吓？早餐就係一件多士，一兜腿蛋通，同一杯奶茶。而家我得番一件多士，咁仲叫早餐咩？
噚日朝早，我食艇仔粥齋腸，你又話好耐無食艇仔粥，成兜攞走，結果我又得番兜齋腸。今日，我食老麥，豬柳蛋烘鬆餅糖漿你都攞埋，我得番杯齋啡。你竟然仲叫我唔好咁cheap，應該叫份好啲嘅早餐。
上次去飲嘢，埋單果陣你爭住話請。我話AA，你叫我唔好咁cheap，又話平時早餐平嘅我請(雖然我無講過)，去吧飲嘢貴嘅就你請。但係你即刻話因為趕返工，冇帶cash又冇帶卡，淨係得張八達通，叫我俾住先，遲啲大家夾番。我提你上次成班同事去飲茶，你都係話趕返工，冇帶cash 又冇帶卡，淨係得張八達通。咁即係無論AA定係你請，結果都係我請。到底你係咪成身咩都冇，除咗得套suit同張八達通。
你話套suit成萬幾蚊，質地、設計、cutting係唔同啲，你叫我唔好咁cheap，成日買埋晒啲千零二千蚊減價嘢，識著梗係著名牌啦。生活係要有要求。就算食焗豬扒飯都要講quality，快餐店賣50幾蚊嘅，根本係垃圾，只有六星級酒店賣三百幾蚊嘅，先可以食得落。對你嚟講，未試過三四百蚊豬扒飯嘅，根本係唔識食好嘢，所以有vendor送水果籃到公司，你都趕先攞咗個日本蜜瓜同支紅酒。好嘢留俾我地咪嘥晒，你諗！
嗰一刻，我終於明白，乜嘢叫真心Cheap。