依家幾乎每日都要搭地鐵返學放學。大家可能麻木咗，究竟搭地鐵會聽過或者見過幾多個警告或提示呢？
有一次我真係數過，由入去站開始，一直至落車離開，共約十六個。 例如，入去站開始，已經叫你拿行李要搭電梯，小朋友唔好亂走，唔准拿氣球，入閘後自動電梯要靠右，唔好著涼鞋用自動電梯驚夾親腳，走去車廂前面或後面比較容易上車，開門嘟嘟聲之後唔好衝入去，列車車門前面按指示企好要讓人出車先，車廂廣播要讓人先出，讓座畀有需要人士，搭電梯要讓畀有需要人士……死未？
點解地鐵站有咁多提示呢？呢樣係一個結合行政管理及法律要求的究極。目的係，希望大家聽話，可以最有效地去搭車同走人。大家趕時間，於是不知不覺硬食咗呢種管理方式。另一個原因係法律意見，因為逢有意外，公司一定有法律意見叫佢地快啲響當眼處放置提示或警告，因為咁樣可以減少承擔民事責任。將呢兩樣嘢有機結合，就係港式管理主義之最高境界。
本來，搭地鐵睇警告已經係生活一部分，我都麻木咗。但係，最近一個警告，我真係火起，呢一刻真係要爆嘞！呢個廣告係請推BB車的家長，要用電梯，唔好用自動電梯。呢樣嘢，我經歷過，因為用自動電梯咁樣做係唔理想嘅。
但係，冇試過用BB車搭地鐵嘅人，又點知家長都唔想咁樣做，最大嘅問題係地鐵嘅電梯服務，係相當之PK 呢？
例如，如果你依家響金鐘站想搭lift，簡直係黐線，一來用嘅人十分之多，排晒長龍咁。於是，一定要等幾部至有。二來，部lift 窄到一個地步係，如果BB車唔係有縮骨功，根本上塞唔入兩架。當有一部BB車響裡面，又唔係入多幾個人，跟手入唔到去的速遞界朋友就會MM聲。
仲有一個車站叫中環。因為中環係醫生集中地， BB車有時要去中環，咁就真係PK。因為港島線嘅電梯，又係窄到黐肺，真係塞唔入。響人又多又塞唔入的情況下，我真係見過遊客推住架BB車好無助。
地鐵會話，唔緊要，按緊急掣就會有人來幫手，吓，又要跑去搵緊急掣，響邊？
更PK的是，當要出閘去地面時，由於BB車上落唔方便，有次我病病地響金鐘站想請港鐵職員，整個輪椅用的起落架將BB車送上地面。職員來了三個，個個唔識用，後來問完當然係唔准啦。好，職員都話，幫手拿。我見個後生個樣咁騰雞，不如自己搞啦。於是就用洪荒之力拿上地面。
嗱！香港家長你可以唔理，但係遊客上落超唔方便呀，係遊客呀！遊客呀！你估我地家長唔想用電梯咩？你可以唔理香港家長的感受，你要理下遊客呀！
我估，以後地鐵會搵幾個月台助理企響度，叫人讓個位畀 BB車入lift……真係暈低。