以前幫手搞大學嗰陣(係呀，五年前幫手搞大學，連註冊都ok咗，係因為某人上任之後，收番土地起樓而玩完)，同美帝、英帝專家傾大學教育。咁樣，先至聽到前沿嘅教育趨勢。
講到商業教育，佢地花咗好多時間，去反省一下依家商科教育之改善方向。佢地提到，自從美帝金醜爆煲之後，大家發覺，金融教育之缺點，在於缺乏商業道德嘅教育。咁佢地響理解之後，於是就響課程方面改動。
依個趨向點樣呢？其實唔只響商科教育方面改動，連埋嗰啲專業學科方面，原本唔係咁夠嘅ethical studies，例如醫生、律師嗰啲，即刻加碼。看官如果睇番呢十年八載嘅名校MBA同埋部分專業碩士，以前冇搞嘅道德教育，或者以前搞得唔夠嘅相關教育，即刻補番飛。
乜依家商科畢業嘅朋友，同以前有乜唔同？唔通以前冇讀咩？當然唔係。以前讀嘅，係以賺最多嘅錢為目標之餘，企業點樣做好社會責任。即係企業作為法人，點樣同社會互動，做到良心企業。另外，例如企業作為法人(似番一個人）點樣友善地對待員工，同顧客做好互動云云。
響同顧客互動方面，呢十幾二十年之變化，就係將顧客PR化。即係話，用PR之言語處理顧客服務。做到最極緻嘅，就係美帝聯x航空。好多人都知道，同佢地聯航之顧客服務電話傾嘢，電話另一端之服務主任，個個之言辭口氣相當尊重客人， 唔係sorry就deeply regret之類，但係講出來硬係唔知點解，乘客打親去都同佢地嗌晒交。言辭就PR，表達就冰冷，錢就繼續賺。
點解會咁樣？企業當然要檢討，但係另一方面亦同上幾代管理層之訓練，即係以數據管理取代人之管理，以追逐時間、速度及效率為升職加人工之量度指標。久而久之，依家好多上層管理者，話之你口口聲聲打廣告做social media猛講點樣對顧客友善，實際上都係得把口。個個都唔係講一套，做嗰陣就會打折扣。
香港係資本主義社會，當然呢方面去到最盡啦。香港之公營機構，鐵路又好，巴士又好，都係以數據為主導，乘客之感受係唔重要嘅，呢種管理心態，就係金融爆煲咁樣，追數為主，顧客感受留於口頭。同佢地呢堆老餅火星級管理人講，今時今日講商業道德教育，係將人文精神注入去內外管理，讓顧客覺得自己係一個人。呢啲嘢，同香港商界前輩講，就會畀佢地鬧到一臉屁。你幾時見過有地鐵搞一日一文學(唔係勵志金句），巴士支持詩詞創作(唔係中小學作文比賽）呢？
我又唔怪佢地，因為佢地上位之時，呢種新形態之商業道德教育唔係咁樣教，亦唔需要，依家要佢地轉mindset，即係要人地六十歲人，將佢地幾十年之智慧一筆勾銷，梗係嬲啦。
香港要進步，真係唔容易。