18年一開始，東亞局勢即時一變，真係令人嚇一跳。大家都會問，點解北韓金將軍忽然會同南韓佬會談？咁樣，北方大國響今次事件上，角色係點樣？
呢個星期，成個情況好怪異。
一方面，西方媒體突然有報道話，公海之中，有船公司公然違反聯合國禁令，走私賣油畀北韓。睇完條片都知，成件事真係有一啲有力量之國家睇到實，如果唔係點會巨細無遺地響媒體報道呢？矛頭當然係指北方大國同埋有人利用香港公然公海賣油啦，係未？
另一方面，English Choi政府，唔知點解又咁巧合，將十二月嗰陣之「共諜」案，忽然之間又爆晒出嚟，而且仲要好詳細咁樣將邊啲邊度嘅辦公室，畀錢一班人辦網媒呃like收集情報，全部講晒。係人睇完，都會覺得係北方大國之身影啦！大家如果扭開台灣電視台，全部都係鬧到強國飛起，一定要嚴懲間諜云云。咁樣搞法，北方大國又硬食一嘢。
好啦，就響呢個時候，金將軍忽然又話，可以同南韓佬傾，仲願意派運動員去南韓參加冬奧，仲要打通埋兩韓直線電話，齊齊傾下偈。嘩！唔係嘛，上個月金將軍仲響度試射飛彈，聯合國又話要加強制裁，南韓佬訪問北方大國仲想北方大國幫手搞掂金將軍，緩和局勢，點解忽然之間又大家面口好番晒，笑容滿意握晒手呢？須知道國家與國家之間要做到一啲政治上之突破，唔係一、兩日之事，隨時可能至少要搞幾個月，兩韓之間，係未已經一早響度，一邊放飛彈一邊傾呢？
咁又唔知點解，幾日之前，又有一份聲稱係北方大國之辦公廳，去年九月內部文件流出街，裡面講到似層層話北方大國對北韓假制裁。當然，北方大國已經即時批評話係假新聞假資料。
但係點都好，美帝就借呢份文件批評北方大國冇真正落實對金將軍之制裁，嘩！成件事點解咁巧合呢？
睇到呢度，可以大膽假設：美帝響舊年已經知道，北方大國好大可能會假制裁北韓。但侵侵收到風扮唔知，照去北京訪問順道向北方大國施下壓，睇下北方大國係未真係制裁。同一時候，就搵咗一個南韓佬，走去同金將軍建立管道溝通。傾嘢睇怕都要幾個月時間呢！咁樣，響未傾得有成果之前，美帝就詐傻扮懵，一於就按原先計劃，去做一場聯合國show，測試一下北方大國係未真係搞制裁，另一方面就加緊，夾到兩韓可以坐低傾。當美帝知道兩韓傾好之後，就寶劍一揮，金將軍示好，南韓佬ok，美帝就出手，然後大家就見到一大堆油輪公海賣油事件，辦公廳文件(都唔知真定假)，總之就搞到北方大國好麻煩。
原本係北方大國之六方會談處理北韓事務，依家就變成兩韓加美帝幕後推動之2+1會談。依家，邊個敢話美帝無料到？