我臉書定期都有「肥平速遞」，講下美帝法院啲相關肥平案嘅最新文件，兼短評幾句。老友A話不如放響度同讀者分享。此言甚是，講幾句觀察都OK嘅。
好多網友問過，唔畀保釋之關鍵響邊度？我估好多因為唔知佢第一次申請保釋時的報道，咁就睇漏咗一個關鍵位。當時法官在庭上，指出過法庭收到當地Pretrial Service的報告，指出肥平係唔適合保釋，包括肥平直系親屬唔響美帝，有潛逃風險。呢一點，就係貫穿咗之後兩次保釋時肥平律師面對的頭痛問題。
同案之另一被告係加迪奧。佢一早就保釋成功。雖然肥平法官冇直接comment過點解加迪奧畀保釋，但係肥平唔畀的原因。但當時響庭上亦討論過呢個問題。睇番同案另一個被告加迪奧，佢老婆手持美帝護照，佢又手持美帝綠卡，又響紐約附近有間屋等。呢個同美帝之聯繫，就係今次即係上星期肥平申請保釋時，點解都係說服唔到法官之原因。因為法官覺得，如果有直系親屬係美帝人士，咁肥平就有一定之道德壓力，唔可以就咁離開家人一走了之。
因此，從今次審訊推斷，無論肥平點樣加碼──即係加保釋金加多些人事擔保，都係好難動搖到法官。咁樣做其實係迫緊肥平之律師，係唔係要考慮其他的可行方案，例如同控方傾deal呢？
至於控方，今次都玩得好盡。就係響保釋案開審前幾日，先至公布一大堆電郵，即係依家媒體見到的電郵。果啲響法庭呈堂的電郵，都係由FBI攔截及監控底下肥平發出的電郵副本。點解要出呢啲電郵呢？我覺得有幾個警告意味。第一，咁樣做係畀外界知道，肥平一舉一動，都在美帝掌握之中。換言之，唔通你相信，美帝唔會響電郵之中，尋找更多線索，又唔會咁樣會睇多幾轉，順便搵多啲料，搜集更多「衰嘢」呢？
第二，就係一種心理戰，等肥平感受更大壓力。即係咁，呢啲響肥平被扣留期間之電郵資料，本來都唔會呈上法院，本來就唔會出現響報紙及公眾平台的。就係因為肥平堅持去馬要保釋，咁控方就一於用呢啲手段，即係呈堂之做法，等肥平律師知道，只要你個客肥平，仲想申請保釋的話，下次聆訊前隨時會更加多嘢爆出嚟！
美帝呢招好陰險。因為肥平要顧住做好聆訊準備，但係又唔知政府仲有乜嘢花招，就會有極大心理壓力。 即係話，肥平越要申請保釋，就越多嘢會爆，爆盡肥平關連人士之人名同操作，咁唔單只令家人生活響「威嚇」當中，肥平仲要愁多幾錢重。控方呢招，變相叫肥平就最好聽聽話話，唔好再搞乜嘢保釋，否則，下次申請保釋之前，仲有更多好嘢爆出嚟。美帝檢控官借肥平出庭，抹黑肥平之形象，呢一次相係成功。