美國麻省理工學院(MIT)係全球頂尖高等學府，慧眼揀選香港成立該校全球首個創新中心，名為MIT Hong Kong Innovation Node(The Node)，花了1年時間籌備後，終於昨日在九龍塘生產力促進局正式開幕。特首林鄭月娥出訪長沙前亦出席開幕儀式擔任主禮嘉實，認真俾面，佢話「政府將不遺餘力，發掘更多本地創科潛力」，可見政府非常重視創新科技。
眾所周知，MIT盛產科技企業界人才，前財爺曾俊華亦是MIT校友，原來佢昨日都有現身到賀，不過唔知係咪唔想搶特首風頭，所以全程顯得相當低調。
都係講番主角MIT，佢哋喺香港籌備期間，由2015年起已舉辦多個活動，昨日一班大學生便即場展示參加MIT創業與製作技能工作坊(MEMSI)的成果，令Ray大開眼界。佢哋發明了一個叫BeThere的遙控視像機械人，方便一班忙於工作未能及時回家照顧小孩的父母，透過一個遙控手掣及一個會走動的機械人，與子女進行視像通話。
仲有一個發明叫Sightecho的智能潛水鏡，呢個潛水鏡會顯示水深、氧氣量、剩餘時間及方向等等，以後潛水唔使掛住望隻錶，可以專注前面的靚景啦！
The Node正式開幕後，相信MIT學生會與本地學生有更多合作機會，Ray期望將會有更多令人眼前一亮的創新發明。
