美帝上周六忽然拉咗我城前局長級官員，確實令人嚇親。圈中人鍾意用「肥平」來形容佢，咁我都用埋一份啦，親切啲。肥平呢單嘢，真係好多疑團，單嘢爆出嚟，係真係偶然，定係有備而來呢？
第一，講吓人。單嘢牽涉幾個人。主要係肥平同埋一個前外交部長及一個外交部長。不過，隨咗佢地之外，仲有好多人有代號。例如肥平上司，係用代號唔用真名。仲有，肥平的助理又係代號，咁究竟呢班代號係乜人呢？如果真係有心去搵的話，就會找到佢地的名單。咁美帝點解要響呢個時候，畀人咁容易去搵到呢堆代號背後的人名呢？例如肥平的上司，搵出來唔係香港人，而係有頭有面的北方大公司領導，美帝又點解唔拉嗰個人而拉肥平呢？
第二，講下時間。因為呢單案，原來係由2014年一直查到2017年。咁樣就真係好奇怪。呢三年來，究竟美帝除咗查呢件事，仲有響肥平單嘢，查緊咩嘢呢？相信肥平背後果間公司或慈善組織，一定都有唔少民間外交工作，咁佢地除了非洲果兩個國家，仲有冇同其他非洲國家有外交呢？於是我地又問，點解係查呢三年呢？由2014年查起，有乜嘢事件，啟動咗成件調查呢？
跟手就要思考，成件事係由上星期五、六拉人封艇的。查上周六紐約應該有個event，於是可以拉人。起訴書睇到，調查係查到今年一月，由今年一月到十一月，美帝花咁耐時間，響度爭論緊啲乜嘢呢？而且，十一月係一個相當敏感的時候，因為侵侵總統會響十一月初去中國。大哥，十一月十日侵侵訪問完亞洲，十一月十六日紐約地方檢查官向法院申請拘捕令，係唔係咁巧合呀？
而且，拉人方面，查實肥平之外交級數唔高，拉佢無後果。但係被指收水果兩個非洲大哥，係前外交部長或現任外交部長，佢地唔係一般人。美帝係要考慮外交因素，特別係拉人後，會唔會因為咁樣影響美帝同非洲國家之關係。響呢個情況之下，呢啲個案點都要上去高層至拍板。
當然大家睇唔少報道或者美劇，大抵都知美帝地方檢察官個個都勇猛剛強，但斷估牽涉到外交層面的事，都唔會自把自為到目中無人，亂咁拉人。如果成件事，美帝司法部高層係知悉的話，美帝高層有冇向侵侵通報呢？通報咗之後，有冇其他因素，只係拉呢兩個，而唔去拉其他人呢？
第三，講下保安。有關起訴書內，所有電郵紀錄一網打盡，即係有關中資公司同慈善基金，真係無掩雞籠，任人下載資料嘅？係美帝真係科技犀利，乜電腦都爆得入，定係肥平身邊有內鬼呢？係電腦保安有問題，定係保安問題呢？單係呢樣嘢，隨時打窒晒未來民間外交啦！
所以，成件事真係詭異！