有人話，鬼比人公道。我疑惑，既然鬼是由人變成，一個生前不公道的人，怎會在死後失驚無神變成一隻公道的鬼？
端午，食粽；中秋，食Mooncake。鬼節，有甚麼慶祝活動？食元寶蠟燭？
啋。這是鬼的節日，唔輪到活在陽間的我們耍樂嬉戲。
但我總想做點甚麼，以展示我的戒慎恐懼——於是每年鬼節，都會翻炒一次被喻為香港開埠以來最恐怖的鬼片《凶榜》。如果你有睇過「浪漫月巴睇舊戲」，應該知道在1981年，《凶榜》上映那一年，我便在大人陪同下入場觀看呢齣鬼片。
嚇到中途就哀求大人帶我逃離現場——畢竟當時只得6歲，唔確定有冇神，但肯定信有鬼，而《凶榜》又實在太成功地拍出了嗰隻厲鬼的兇猛，再配合片裡陰森氣氛營造，以及大口青恐怖死狀，絕對足以令一個六歲細路驚到瀨屎(而我又明顯不想在戲院內瀨屎)。
好多年之後，已經把《凶榜》睇到識背，而由2015年開始，我．不．再．相．信．有．鬼，翻炒《凶榜》，純粹是一種(冇乜原因的)情懷宣洩。
在熱到崩潰的鬼節首天，我開了一罐超冰凍汽水，熄晒成屋燈，又再睇《凶榜》，竟然睇到了過去咁多年來都睇唔到嘅嘢——不是睇到甚麼(冇被拍下的)恐怖嘢，而是睇到故事遺留了一些冇解釋的離奇位。
1.正義的茅山師父岳華說，任職大廈保安的秦祥林是萬中無一、陰日陰時出世的人，才會被鬼纏上，但無論點，千祈唔好唔返工，否則只會弄巧反拙——Why明知被鬼纏上 & 明知隻鬼就窩藏自己返工嗰棟大廈的地底，依然要繼續返工？可惜，岳華沒作進一步解釋。
2.同樣是由正義的茅山師父岳華說，他一直諗唔通Why隻鬼要用盡方法引秦祥林去嗰棟新建的大廈做保安(故事交代秦祥林In過好多份工都冇人請，但又不願去外父間Bra廠打工)，無奈是他還未諗通，就一命嗚呼(隻鬼雖猛，也需岳華扶持。沒有了岳華的死，我們都感受不到這隻鬼係幾咁強勁)。
秦祥林，作為一個平凡香港人，在一個唔輪到佢揀的時辰被拋擲到塵世，一早就被注定惹硬鬼；就在他本人也漸感瀨嘢時，幸運地，遇上一個似乎有能力幫佢化解劫難的高人岳華(事實是岳華Keep住話萬大事有佢喺度，多次叫秦祥林唔使Worry)——講堅，如果我是秦祥林，如無意外也會謹守岳華一字一句，繼續返工，繼續定過抬油，繼續做好一個平凡香港人的角色，等岳華幫自己驅鬼，帶領自己走出鬼域。
直至岳華自身難保。被注定的秦祥林，只能拎住嗰道爛鬼符，單人匹馬前往不屬於他管轄範圍的地底，趕鬼，結果唔覺意幫隻鬼找到肉身，投胎重生。
如果你睇過《凶榜》，自然知道隻鬼的來歷——綽號「猛鬼紅衫仔」的她，生前被拐子佬殺害，殺害地點咁啱就是秦祥林任職保安的大廈。大廈，是起好了，「過去」在表面上被銷毀了，但有發生過就是有發生過，歷史繼續存在，歷史衍生的孽，直到永遠。
被命運和歷史夾埋玩到貼地，秦祥林萬念俱灰向天怒吼：Why咁多人唔揀係都要揀佢？——天不容問。
今年鬼節，我在《凶榜》睇到一種灰。