已有96年歴史的油麻地警署，現為二級歷史建築。
朦朧煙霧中幾許前塵往事，港產電影常見嘅江湖恩怨橋段，經常描述打滾嘅義氣手足稱兄道弟，「篤背脊」好或「食夾棍」好，現實中，最後都未必係江湖事江湖了……
正所謂生不入官門，但油麻地警署正好門外「打卡呃like」。
「嗱！而家冇必要你講，但你講嘅一切，將來都會作為呈堂證供！」所謂出嚟「行」要知邊個係最大「莊家」，政府提提你：「有借有還，還得起先好借！」。
江湖電影有浩南哥，臥底片有陳永仁、有韓琛，但難忘圍繞以油麻地作為背景嘅《半支煙》；故事中有一幕：「煙仔」霆鋒、跟「下山豹」志偉哥同往油麻地警署附近，尋找煙仔自己一直暗戀的對象——女警陳慧琳……
法治下的華麗風格
「油麻地警署」在香港影視中，絕對係不可或缺嘅取景勝地，管轄範圍包括碼頭廟街榕樹頭，可謂係香港社會基層生活文化共冶一爐；以往可以包容「企街」，今日全力捉拿「上街」。昔日無論爛仔、地痞、古惑仔，抑或「阿蛇、師姐」去警署唔係因為打劫、打交，就係當更，今日遊客潮人反為就「打卡must GO」！
1893年成立嘅油麻地警署，位處油尖旺中間龍蛇混雜之處，可謂昔日九龍中嘅「大館」。警署原址在舊時又稱差館街的上海街及眾坊街之間位置，至1922年遷往鄰近海旁嘅加士居道、廣東道及眾坊街交界。1924年曾一度改作九龍巡理府(即裁判署)，注意警署正門中文正寫是「油蔴地」警署，而早期與正門圓拱屋簷建築混為一體，藍底白字嘅「POLICE」亦突顯英治時代的法治權威(牌頭上旗杆早期懸掛的是英國旗)，而男性主導嘅警隊所效忠嘅，順理成章都係「事頭婆」英女皇。當年警署建築亦顯華麗，其愛德華式建築風格，三層高警署由面向廣東道眾坊街兩街交界嘅入口中庭，左右延申兩翼大樓有如展翅，南北雙向建築，原貌三層皆為拓石作支柱的開放迴廊，站在入口對面位置，從正觀極顯出警署設計嘅寛大宏偉，自然成為電影取景嘅重點。
警署曾因「中九龍幹線」之設計而打算被作遷拆。
莊嚴下的光影橋段
由六十年代暴動，到九十年代大小槍戰械劫案，警署見證香港法治奠定嘅重要年代；另外其特別之處「正業」為除暴安良，但「副業」係貢獻於香港電影電視文化事業。今天警署要功成身退，在成為二級歷史建築之前，這座九龍服役最久嘅警署，幾許面臨被清拆搬遷。警務處亦罕有為警署作告別儀式，但警署今天仍退而不休，保留了報案室為市民繼續暫時服務，而警署主建築亦一併納入將來的發展保護！實在有賴曾經為爭取文化保育，向政府發聲的一眾人士，包括杜琪峯導演：「阿政府Sir，唔該俾多次機會警署吖！」
雖然昔日光影回憶已經漸行漸遠，但油麻地警署今天將要翻新，希望喺工程完成後，「明日警署」不只是一個超支軀殼，能夠同港人亦步亦近，經歷風浪而進入另一個法治時代。
《無間道》劉建明話齋：我以前無得揀，我而家想做好人。油麻地警署快將正式退役，翻新之後重新做人。