第100個look兩男手牽手，是比喻Guram與Demna打死不離兩兄弟嗎？
VTMNTS首季100個looks，這是第一套，搞乜？TV Buddy咩。
Vetements這個過氣潮牌之前吹了幾個月的新搞作，終於在上周醜婦見家翁面世了，新牌攞走晒品牌的響音，剩低這幾個英文字母，就叫做VTMNTS喎，品牌CEO Guram Gvasalia話期望新牌提供年輕人創作機會，打破傳統大集團商業運作模式云云。
未見衫已經覺得這番言論好作狀，上周新衫終於上場，這個2022春夏系列男裝總共有100個looks，Yes，係100套、唔係100件咁少嘢，我真係諗唔到點解要做咁多衫出來，除咗太過desperate想極力搶「fo」以外。因為佢呢個舉動，我代地球講聲「多乜謝！」Guram同《Vogue Runway》解釋，100這個數字，是象徵著品牌對時尚界100%的承諾，咁厚顏無恥都講得出，真係人無恥便無敵。
2018年Vetements曾經推出過關注時裝廢棄的展覽，當年Guram講過展覽目的，就是要引起公眾關注時裝過度生產及消費的問題，今日新牌咁搞法，豈不是今日嘅佢大巴大巴咁刮落昨日嘅佢塊面度？但佢份人咁無恥，應該don't fxxking care㗎啦。
如果大家覺得我評語太harsh，埋嚟睇下佢啲衫先啦，老實不客氣，跟Vetements的分別在哪？連帽衛衣係少咗，但大量潮童味的logo、barcode等無處不在，慌死你唔知這是Vetements新牌作品，差不多一式一樣的披搭轉少少顏色就當一個look，完全看不見新在哪，而且styling也很趕客，東歐街童味玩咗幾年喇仲唔厭，就算是童年回憶是情意結，玩足幾年都夠皮了吧，我看外媒除了《Vogue Runway》還幫他吹奏一番，其餘大部分都抱觀望態度，好在這個世上還存在正常的人。老實說，這麼爛的牌子不是這麼離譜還根本不想提起，對著它真係好想講粗口：「快啲執乜咗佢喇！」完。
轉下顏色又當一個look。
衛衣係少咗，呢件玩《回到未來》圖案，其實同亞馬遜和Esty上的無名牌子有乜分別？
2018年Vetements於倫敦Harrods櫥窗的廢棄衣服裝置，引起公眾關注時尚界污染問題(佢又唔諗下自己)。