大師姐╳無印良品MUJI DIY蘿蔔糕手作包套裝

牛年到，代表一眾蘿蔔糕殺到，我每年都買糕食，今年打破慣例，決定自己動手整。大師姐今年夥拍無印良品MUJI，首次推出DIY蘿蔔糕手作包套裝，為喜愛煮食嘅朋友提供另一款選擇，亦為咗我呢啲新手上路提供方便，套裝內附送無印良品琺瑯食物保存盒，仲有大師姐特別揀選製作蘿蔔糕材料，當中包括日本北海道瑤柱、厚身冬菇、臘腸與臘肉、冇染色冇防腐劑的印尼白蝦米，天然不含味精的清雞湯及粘米粉等，只需買個新鮮蘿蔔，就可跟住包內的食譜秘笈輕易製作蘿蔔糕。大師姐更提提大家蘿蔔可選內地產或日本大根，揀選時以重身墜手及外表皮光肉滑為佳。