牛腩河$30 雙拼牛雜+$10
翠屏邨有牛雜腩食咁大件事冇人講？
仲要咁平賣三十蚊碗咁大件事冇人講？
啲牛腩牛雜仲要幾OK咁大件事冇人講？
冇人講咪我講囉。
我講唔得㗎？好委屈我㗎？
我就係覺得冇人講翠屏邨德發牛雜粉麵幾正，自己就好有優越感，連openrice都係得一個po咁大把，乜嘢食肆都實有第一個人講架啦，好聲好氣介紹唔得嘅，係咪以為個個都廿四小時mon住邊度有乜嘢食都知？真係唔知有件咁嘅事吖嘛，冇人知冇人提咁咪我提話人知囉，我知又唔講其他人唔知又可以點樣講啊？
當出面一碗牛腩河動輒五六十蚊起跳，見到德發賣緊三十蚊一碗，簡直係良心價，質素仲要唔差，最起碼夠腍，切腩有靚位牛雜色水都OK，可再入味一點就更好，街坊生意賣咁平別期望過高，做人不要太挑剔，就算不完美，今時今日有啖安樂茶飯食都要感恩。
德發牛雜粉麵│官塘翠屏邨翠桃樓M2層熟食中心4號舖│5599 6085