白松露，真係好貴

白松露，被譽為餐桌上的鑽石，究竟有幾貴？食米唔知價的我從來沒概念，直至我將白松露放入口之前才認真地去確認。就以我喺尖沙咀帝苑酒店意大利餐廳Sabatini為例，呢度嘅白松露全部來自白松露之都意大利阿爾巴，又靚又大粒，玻璃瓶一打開，獨特幽香充滿整個空間。每克賣港幣$158，所以每刨一下都同刨銀紙冇乜分別，難怪Chef Claudio話只有香港同澳門先會咁癲買咁大粒。作為香港人，只要你懂得吃捨得吃的話，係幸褔嘅。

白松露只適合生吃，同佢最friend都係啲簡單食材例如雞蛋同意粉。Sabatini主廚深諳此道，一碟牛油汁幼蛋麵刨上幾片白松露，典雅優美，香氣撲鼻，始終係意大利人，對意大利食材最為了解。我喺FB同IG見過有中菜廚師將成粒松露刨落燒鵝炒飯上面，仲一臉自鳴得意的樣子，味道又濃又鹹完全破壞晒松露香氣。呢種土豪式食法真係九唔搭八，若果俾Chef Claudio見到可能會爆粗：Vaffanculo~~