國泰航空（0293）曾經係港人引以為傲嘅航空公司，安全度滿分，服務優越，年年業績表現理想，小小香港有間咁出色嘅企業，經營者應記一功。點知呢幾年唔知發生乜事，國泰服務竟然淪落到變咗間廉航，業績又跑輸大市，就連過去透明度都冇埋，你話邊個要負責？
如果近兩年你坐國泰，肯定覺得有好大唔同，例如有啲航班冇咗上機後嘅花生同飲品，又有啲航班連電影都Cut埋。講到服務（都唔講空姐個樣），更加係大跌Watt；我可以分亨一吓經驗，有次坐飛機問空姐攞毛氈，佢話冇晒，咁都算，你估佢跟住講乜，佢話可以俾張別人用過嘅俾我，吓！咁都得，我好想問問，係咪可以退返部份機票錢呢。
國泰變咗廉航
又有朋友試過（唔單止一位）寄艙行李唔見咗，然後搵國泰理論，佢哋效率慢不特矣，客戶服務部仲愛理不理，奉旨要你打電話去追，然後回應又毋寧兩可，最終要好幾天先搵返，你話幾激氣。
點解會出現咁情況？聽聞係管理層見航空市場競爭激烈，要開源唔容易，新嗰位CEO朱國樑上場後咪只好勁節流，但一減資源，服務肯定首當其衝受影響，結果慳嗰少少錢，國泰經營幾十年個金漆招牌就咁剥落，你話值唔值，真係見仁見智。
最慘係你減咗成本，業績有啲起色都好，點知班管理層睇市準過沈大師，買期油對沖勁輪錢，剛公布份業績竟輸咗45億（其實上年度對沖時已蝕80億），雖則話油價大插好難料，但貴為一家世界級企業，錯得咁利害，作為管理層真係要認真檢討，查找不足。
透明度衰過3線公司
業績表現差都算喇，管理層喺企業透明度上仲差過啲3、4線公司，早前中期業績記者會，有媒體問業績咁衰點解唔發盈警，國泰CEO朱國樑話每月有數據公布，投資者應該察覺到。吓！如果你係百富環球(0327)呢啲咁嘅公司，我可以原諒，但你係堂堂國泰航空，藍籌公司，全球十大航空，企業管治曾經「冧巴溫」，竟然講呢啲咁嘅話去敷衍公眾，朱生有冇羞耻之心？
國泰每月公布資料，只係啲營運數據，但呢兩年國泰業績差，主要衰喺油價對沖上，試問佢地有冇公布每月期油對沖盈虧數目。況且一般小股民又唔係分析師，邊有咁心水清識得解讀呢啲專業數據，你係咪有責任發盈警提醒一下公眾。
咁喇，既然國泰甘心做一間服務唔到位嘅廉航（但佢收嘅費用係全服務航公空公司價格），管理層對全球經濟掌握得咁差勁，又冇透明度兼夾賴皮，我只好喺度祝佢好運囉，要我買國泰股票，No Way！