最近有兩個招聘廣告喺網絡激起千重浪。不久之前，有一間出版公司請編輯，以月薪$7,300至$9,000，請一位「編採寫」一腳踢的編輯，網民群起怒插。文字工作者人工低都唔係新鮮事物，但竟然連向來感覺高不可攀嘅 IT 界都淪陷，有本地 IT 初創公司用時薪$32.5招聘程式員，我真係想喺Facebook創辦人朱克伯格嘅Timeline上面Share呢單新聞，睇下佢有咩回應。
網民一面倒向這班無良僱主「鞭屍」，更有人指出，做保安員嘅薪酬遠高於呢啲需要一定學歷嘅職位，大歎今時今日係高學歷低薪酬嘅黃金時代。不過想深一層，出現呢種現象，真係可以淨係怪無良老闆？
馬雲十幾年前做過一間雜誌社，好好彩入職人工都高過$9,000。當年我同一位開雜誌社嘅「無良僱主」幾熟落，記得喺沙士之前，有次同佢飲茶吹水，先知道原來佢間公司成立超過十年，咁多年來係無「加人工」呢個詞語，而當時佢請編輯永遠都係得一個價， $7,000，而呢位老細係抱住「啱就埋嚟、唔啱就過主」嘅心態。
我好奇怪，咁嘅營運方式真係Work？點挽留人才擴展呢？呢位老細講咗一句到依家我仲記得好清楚：「馬雲，呢份工我覺得只係值$7,000，點解我要畀$7,500？市場上總係會有人覺得自己只係值$7,000，我就要搵呢個人！」最後一句當時對我嚟講係當頭捧喝，因為我明白到我唔增值自己爬上去的話，我就會變成搵$7,000一個月嘅人。
近三四年我無再同呢位老細傾過，亦唔知佢係唔係仲用$7,000呢個標準去請人。不過你唔好理，呢位老細當年已經住豪宅、養幾架車，佢幾本雜誌仍然頂得住網絡潮流，依家仍然健在，佢嘅「成功」，靠嘅就係資本主義嘅精髓。
有雞先定有蛋先呢個咁高深嘅哲學題目，我唔識答，但我肯肯定係有一班自己認為只係值$7,000一個月嘅打工仔先出現，呢班「無良僱主」先會咁有恃無恐，你睇下有無茶餐廳老細用最低工資請人洗碗？當香港個個老豆老母都想自己仔女打寫字樓工時，白領嘅「市場供應」非常充足，低增值嘅白領工自然係人工低；相反「肉類分割技術員」、「瓷器洗滌師」呢類無人願做嘅工，人工高出一截亦只不過係簡單嘅 Supply and Demand。
所以唔好怪人出手低，要怪就怪土地唔夠啦！