踏入羊年，借呢個欄又講下羊。金融圈都有唔少動物嘅化身，馬田史高西斯鏡頭下就有套《華爾街狼人》(直譯應該係《華爾街之狼》)，一套戲名就已經睇到金融人嘅刻毒、涼薄、貪婪、冷血；基金經理索羅斯更加係公認嘅大鱷，食完人，骨都唔Lur番一嚿嗰隻。
至於羊，正如特首梁振英羊年賀詞話齋，給人嘅感覺係溫馴、和善嘅群體動物。但事實上羊係唔多「老黎」嘅動物，大部分羊嘅成語都係負面，好似「亡羊補 牢」、「代罪羔羊」、「歧路亡羊」等等，好多人都唔欣賞羊嘅特質。羊嘅性格，做民眾當然係最好不過，因為個個聽教聽話，如果成個山頭都係羊，狼自然係少好 多煩惱。但係以呢種特質行入去成街係狼嘅金融市場，真係同自己向後翻騰三周半抱膝跳入個羊腩煲度無乜分別。
落場炒得股票嘅人，問十個，十個都唔認自己係羊，覺得自己可以贏錢離場。但實際況係，無論你係幾咁精明、幾咁有錢嘅人，都總會有羊群心理出現嘅一 日；無論你之前投資係幾咁理性，去到一啲突發事件發生，好似金融海嘯來臨，你總會無啦啦無咗理性嘅投資決定，人地做乜你就跟住做乜。
馬暈一位身家去到10位數嘅世叔伯，擁有一副咁嘅身家，當然成為投行嘅貴客之一。呢位Uncle股齡唔細，仲要旗下公司都有證券交易牌照，平時炒股 都算係幾精明下，投行經紀講貼士佢都係聽咗就算，睇完幾份大行報告再自己計過晒先會重槌出擊。但係Uncle喺金融海嘯之前以超過80蚊入咗滙控，再喺跌 到見過33蚊之後，無耐反彈返上去40幾蚊就走晒批貨。最近同Uncle傾開收市競價問題，順便問下佢當年點解會放咗滙控，佢都話今時今日睇返自己嘅決定 都係好錯，完全無考慮清楚就打電話畀經紀沽貨，佢話自己都唔知點解當年會下一個咁嘅決定。
好多人覺得自己好精明，但其實世上有更多更加精明嘅人，可能去到李嘉誠咁「狼」嘅級數，先會發現身邊全部都係羊，自己先唔會受到羊群心理所影響。
喺呢度恭祝大家股場「揚揚得意」、唔好做隻「迷途羔羊」！
