唔知點解，我好鍾意MiMi姐個深圳牙醫廣告，佢抵死嘅語調去講嗰幾句對白，咁多年來我都係咁印象深刻，特別係「舢舨充炮艇，睇牙要知碇」呢句無厘啦更嘅押韻句，真係一絕。
「舢舨充炮艇」，喺股場絕對係莊家經常用嚟出古惑嘅方法，明明間公司係老襯底，但都可以包裝到鱷魚頭，惹來投資者追捧。近日亦都有一單好「經典」充炮艇事件。
有隻叫長和國際(0009)嘅公司(記住唔係李超人間長和)，無啦啦港交所權益披露網站到顯示佢地有68%股權「轉移」至匯金公司。匯金係中國四大銀行嘅大股東，一間細公司得到大後台入股，係最能夠刺激股價大升嘅消息三甲之列，佢地嘅股價亦都幾級跳。
事件經過傳媒報道之後，星期一長和國際嘅股價嘭一聲升過超過一倍，公司只係出個「不明股價變動原因」通告交代。股價大漲收市後，公司先至再出澄清，原來68%股份唔係匯金真金白銀買，只不過係大股東將股份抵押咗畀匯金旗下公司，按規定都要上報港交所，只不過港交所權益披露度無寫明咁解。
成單料最令人不忿嘅係，抵押股份呢個動作，公司大股東明明一早就知道。抵押股份係對股價不利消息，公司管理層唔盡早公布之餘，仲拖延到股價炒足一日先至披露，馬暈唔知咁樣算唔算違規，但就肯定係對小投資者極之唔公平。
港交所個權益披露亦都係陷阱處處，大股東抵押股份借錢要上報唔係問題，但個網站就無完全明確提供股份轉移嘅目的，令市場左估右估，呢個亦唔可能喺一個國際金融中心發生。
最悲哀係，人地可以舢舨充炮艇，小投資者就只能夠做炮灰！