莊家呢個名詞，近日喺股場又再次「盛行」。恩達(01480)呢隻上年12月先上市嘅半新股，無乜人知道佢係做咩生意，但好多股民都知道，佢短短三日就由個位數炒到上100蚊，再用兩日時間跌返去個位數，呢種炒法馬雲炒股十幾年真係聞所未聞。
有咁嘅炒法，好多行家都話係莊家幕後操作。根據中央結算嘅資料顯示，大股東持有75%股份，即係話公眾持股量有25%，但係喺股價大幅炒上之前，有23%股權係落喺僅僅四間證券行嘅「客戶」手上。局外人唔知呢啲客戶有幾多人，只係知道證券行幫客持有，但最吊詭嘅係，過去幾個月恩達股價慢慢上升嘅時段，四間證券行嘅持股竟然有「左手交右手」情況出現，的確係令人可疑。
恩達事件令證券界再次關注莊家活動，但其實我地日常生活亦都有唔少莊家存在。好似依家講到香港人都悶晒嘅政改，可以話係莊家活動嘅最大寫照。現時嘅特首選舉，由一個較大嘅圈子選1200個人出來，再由呢1200個人去揀個特首；「幕後莊家」控制住601個人嘅投票意向就可以將香港「舞高弄低」。
政府嘅政改方案，繼續由1200人把關，揀完揀剩先畀你班香港人選，就好似莊家繼續要控制住大部分街貨，再將少量貨派晒畀香港市民，一人有一股，目的就係要大家一齊去承受「舞高弄低」嘅風險，就算將來股價大跌，大家既然都係條船上面，就唔好再咁多聲出。
我只想問一句，有邊個可以拉咗呢個莊家？