布魯士難保帥印。
國際賽期平淡無味，但爆出沙特王儲終成功購入英國東北第一大會「喜鵲」紐卡素。睇返「阿巴」03年入主當時底厚嘅車仔，用1年時間即捧英超、蒙蘇入主「藍月」4年後封王聯賽；身家係蒙蘇10倍嘅沙特王儲嘅大東北計劃，相信會參考藍月嘅軌跡居多。08年油王入主前，曼城已收到風簽定巴西名將羅賓奴；但同年年尾，隊波跌到護級區，之後先反彈最終排第10位，之後排隊重金簽入巴利、辛達告魯斯、艾迪巴約、高路托尼、泰維斯同列士葛等當打即食兵。現時紐卡素成手爛牌，最強得法國快馬辛特麥斯明，超級富豪入主消息嚟得突然，佢哋最快要等到下年1月轉會窗重開先可以班兵。
聯賽現時7戰3分排第19位嘅喜鵲，宜先賠800萬鎊炒主帥布魯士，盡快搵個有料教頭過渡今季，保得住英超席位又水頭充足，到時請到好似多蒙特嘅歐洲新星艾寧夏蘭特，呢類高大衝刺型中鋒為核心，大風大雨大雪打乜戰術也不怕。否則，叫沙特王儲冒寒光臨聖占士公園球場睇護級戰，都咪話唔尷尬。