自從安東尼馬菲奧斯重金投曼聯，往後成名路上，好難唔同阿仙奴嘅「小馬」加比爾馬天尼利比較。二人份屬好友，年紀接近，同樣司職翼鋒，一同贏東奧金牌；不過球風同性格唔多相似，可能「小馬」條路比較曲折，年輕時曾四度去曼聯試腳失敗，可幸呢幾年據報重咗7公斤，完全適應咗英超衝撞踢法，沉實小子，勢頭持續向上。高普一早看上嘅「世紀新星」、隊友「耶穌仔」話佢係唔識停嘅「野獸」，今屆大熟5個英超入波包括左、右腳同頭槌，又錄得9次封阻對手射門，巴西主帥迪堤未必看上，但阿仙奴好急想同佢續約。
「野獸」與「自轉王」
相反轉會身價同人工更高、進駐保羅普巴舊居豪宅嘅安東尼，季初已先聲奪人，頭3場英超上陣全有士哥，順風順水，星味十足；上次巴西國際賽選人，安東尼榜上有名，上周眉飛色舞喺歐霸場合，自轉720度演嘢交波出界，惹嚟爭議。二人就算齊入選，喺今屆強手林立嘅巴西國家隊前線，都係大後備；他日可轉型成為善射正箭頭，代替尼馬，成就更無可限量。