英超季前決定走回頭路，由一場比賽最多可換5個變番3個，結果英超傷兵統計，接戰8輪後，球員肌肉受傷人數對比上季同期大增16%，專家指係因季前訓練唔夠同賽期太密有關。英超暫時最長傷兵名單，首推衛冕嘅利物浦，啱啱大炒李城傷埋防中拿比基達，後備席發現有一位「牛奶咀」中場奇勒臣頂檔，未踢過英超。喺高洛普帶領下，愈踢愈勁嘅全能中場韋拿杜姆透露過，隊波今季嘅操練比上季更辣，波士要求更高；傷兵成堆，但換來成績係英超暫時同熱刺放頭，歐聯分組賽3戰全勝，新人、新兵喺季初有機會上位。
一場換3個定5個，未必主導傷兵人數同成績，關鍵係考領隊喺呢個亂世下嘅膽識。紅軍新人爭氣，而車仔公認兵厚，領隊林柏特果敢出過26人，其中19人出場超過100分鐘，佢哋暫時傷兵極少，愈踢愈多變化，有利長途賽。反對換5個嘅狼隊領隊紐奴，隊波今季用嚟用去都係嗰15、16人，隊波踢法帶沉悶；箭頭魯爾占美尼斯踢足頭8場720分鐘，咁用法如果傷咗，狼隊戰力減半。