人非機器，就算球隊擁有C朗或者美斯，季初未見霸氣，情有可原；所以祖雲達斯啱啱先殺低長勝軍國米，上返番榜首，美斯剛戰入佢本季西甲第一球，但巴塞隆拿仲俾皇馬騎住。今屆英超開季早，以為強隊上力快，卻進入一個新格局時代：紅軍獨領，Big Six瀕臨解體。
英超強隊今季踢得特別爛，連今季共4季嘅頭8場聯賽作統計，Big Six竟共失掉55分，對上3季分別係30、44同41分；前季曼城同階段只失2分，早有放甩對手跡象，最終以100分封王，並拋離亞軍曼聯19分。上季曼城仲能跟利物浦單打獨鬥，今季藍月防守缺人，8輪過後已被長勝利物浦拋離8分，紅軍有機會一放絕塵。前六之爭今季會更有趣，車仔同阿仙奴今季鬥出新人勝在鬥志好，有未來，應保到一席；其倫敦宿敵熱刺大鑊，主力球員同領隊心態全部到頂，冇變招能力。不斷換帥嘅曼聯，由蘇斯克查教了大半年，害得當年娃娃臉殺手極速變老，力有不逮。Big Six近三季尚能壟斷前列，今季卻正在解體中。