鍾意玩全馬42.195公里嘅跑手，攞苦嚟辛，剛完的渣馬難度特別高。改喺10月下旬開跑，喺香港賽前多月訓練又熱又焗，好多人特別刻苦，值得佩服，有好成績更值得記念。跑全馬過程變化多，付出同收穫又未必成正比；但又冇得打天才波，唔練好去跑，到時抽住筋尾段上死亡大斜路西隧滋味唔好受。大會指定6小時內完成有獎牌攞，今屆疫情下出賽嘅4千多名全馬跑者，肯落場絕大部分都應該做得到；唔好以為尾段冇力行返去都未夠鐘「閂閘」，當日正午喺大太陽底下有成攝氏25、6度，一出西隧然後去到中環兜圈，再穿過龍和道走過灣仔會展，嗰個時間走嗰段都幾甘。
今屆參賽人數少咗大半，加上流水式起步，全程極少要左穿右插攞位，打氣聲又少咗好多，反而跑得好舒服；全程內心同雙腿幾時抽筋一直決鬥，嗰種要求自己堅持落去嘅心靈大作戰，係多年跑全馬嘅最大得著。據報，不足4個月後，又嚟搞一次，冬季訓練冬季出賽，希望練好啲又抽得中，俾個機會自己再跑返隻「靚馬」。