紅魔終炒「坦克」，反而另一季前唔多睇好嘅荷甲「光頭佬」史諾，領利記季初有愉快開始；精兵絕大部分仍係高普舊部，更難得傷兵唔多，之前賽程較易應付，嚟緊硬仗全部係晏菲路上演，史諾嘅「光」環更閃定轉暗，即將揭盅。
英超近年簽得嘅主帥通常年輕有為、身形扎實，史諾唔同，近似紅軍同市宿敵愛華頓嘅波士達治；佢上星期喺大本營接受前紅軍荷蘭門將、佢荷甲嘅舊隊友韋斯達維特訪問，訪問出街後，紅軍更升上榜首。喺訪問中，睇到史諾場內低調沉實，場外笑談自己後生唔夠速度，所以早想向教波發展，家人仍留在荷蘭，自己公餘玩板網球消遣等等；訓練大軍秘技係要有趣，令球員每天訓練享受嗰種新鮮感，部署針對對手弱點，唔鐘意守波。紅軍隊波主力只係門將艾利臣同祖達傷緊，替補皆有質素，影響唔大，陣容少變化利季初爭功；王牌沙拿喺完約前「最後」一季，大勇特勇，入波助攻不缺，球會今晚起嘅4戰主場分鬥利華古遜、維拉、皇馬同曼城，史諾真正考驗時刻已到！