西布朗久未贏波，主帥佩連斯早前抱怨，嗰班做領隊失敗而轉行當電視台評述員(俗稱講波佬)嘅人，已經擴散到令佢哋一眾行家領隊，承受沉重壓力。又到國際賽期，各大聯賽停火，又係英超領隊落鑊被炒嘅高峯期。早前離隊機會唔細嘅干地，啱啱贏出漂亮一仗，剝咗摩連奴嘅牙骹，但相信最冇癮嘅，會係突然連後備都冇、只係坐喺場邊食西北風，咬住朱古力條嘅大衛雷斯。
干地配得上新一代戰術大師。球隊兵薄，衛冕不易；對住大老闆阿巴，同一眾行政高層，掣肘多，仍能我行我素，從不怕炒魷。車仔有番全能中場尼高路簡迪，可以將「藍髮」泰莫爾巴卡約高推前撞散紅魔防線，為箭頭艾華路莫拉達開路建功；中堅大衛雷斯一向最重要，但駁嘴即被雪藏，寧出丹麥新人，效果一樣出色，車仔氣走紅魔，說服力足。賽後，名講波佬、教過華倫西亞嘅加利佬，質疑干地雪大衛雷斯，因住軍心受損，遲早出事；連任何球員不能大過球會也不懂，難怪呢位曼聯名宿經常被譏唔夠班做領隊。