英超人情免問，今屆一班老細似乎更冷漠。球季只過了兩個多月，已破近年紀錄有5位領隊季中被炒(上屆全季僅4個)，炒人隊波都係會照降班，又可以好似車仔咁上屆攞歐聯，永冇絕對。紐記沙特油王入主，未搵好對象就急炒布魯士，艾馬利、干地同施丹一班大牌唔會同你喺東北捱凍護級、熱刺季前揾非心中最愛嘅紐奴攝時間，對對方嘅期望又高，分手早料。其餘3位「亡魂」全是帶升班嘅功勳主帥，屈福特近2年連看守領隊已有8人接過帥印，人來人往，但老帥雲尼亞里接呢個爛攤子，淨係見到唔修身嘅左閘丹尼路斯場場出醜，隊波神仙難救。諾域治同維拉都係驚恐症發作，怕落返「地獄」英冠，無謂拖拉好合理。諾域治嘅法基有料之人，成手爛牌都頂到咁耐，好快找到另一份好工；反而冇乜料嘅甸史密夫，走咗基亞利殊唔識教，但留低成手好牌俾下一位，維拉反彈在望。炒人「睇攤路」，下一位最危係列斯聯老帥比爾沙，隊波走晒樣又唔好睇，郁人可能快過拖拖拉拉嘅曼聯。
日報