歐聯分組賽開波，列強要攞頭兩名打入淘汰賽16強，根據近年分組賽往績同差距，應冇難度；尤其英超隊喺疫情下，擴軍速度更快更疏爽，只要做好聯賽同歐聯兩大戰線嘅部署，4路雄師要爭入8強甚至內訌爭霸，機會不低。翻查近3季小組次名跟第三名嘅分數差距，雖然由17至18年度平均5.75分，逐年跌至上季嘅3.625分，但所謂歐洲列強爆冷不入淘汰賽，對上兩季首推意甲國際米蘭，國米當時都係身處死亡之組，但今季佢哋喺B組主要對手係實力減弱嘅皇馬，其餘嘅係慕遜加柏同薩克達，應可破悶局。
至於英超今季改回一場最多換3個後備嘅做法，想減少各隊之間嘅實力差距，相信稍後會進一步令「歐聯四子」決心出A、B兩隊應付兩大戰線，以避免主力過勞。環顧英超4隊，曼城同車路士奪小組首名機會甚高，曼聯同組主要對手係巴黎聖日耳門，今晚碰頭其實會知差距唔會太大。上屆16強出局嘅利物浦突有中堅大將華基爾雲迪積克重創，今季跟擅攻嘅阿特蘭大同阿積士同組，多入球騷囉。