6月球壇變成國際賽天下，連嘆慣嘅球王C朗都要「重出江湖」，為主辦國葡萄牙爭歐國聯冠軍。歐國聯係歐洲足協新玩意，志在令實力接近嘅國家隊，有更多較技機會；個人認為，最重要係令一啲最終喺歐國外甩轆嘅實力分子，多一個安全網打附加賽嘅機會，晉身明夏歐國盃，唔想出現好似名牌荷蘭咁，已連續缺席兩個足球大賽決賽周。反正歐國聯4支A組首名球隊，已保證有一個可能不需要嘅附加賽資格，咁明天率先出場嘅葡萄牙鬥瑞士，以及周四嘅英荷大戰，都係爭面子同一億港元嘅冠軍獎金。
歐洲足協個專頁，煲緊邊位可以繼去年皇馬中堅華拉尼咁威，捧完歐聯又幫法國捧世盃，都幾硬要將歐國聯升呢。點都好，一數歐聯冠軍利物浦，共有6人馬不停蹄，要分別幫3支歐國聯4強球隊爭霸；唯獨主辦國葡萄牙冇利物浦兵，但有唞夠嘅球王C朗重返大軍，戰意同體力都佔優，睇嚟大佬有機會幫世青盃分組賽已出局嘅小葡兵，為國奪冠爭番口氣。