英超成日有領隊聞到魷魚香，近排吹得最行嘅，係比歷定朗奴高文做今季第三位離職波士，結果愛華頓大敗予阿仙奴後，朗奴高文果然冇得留低；其實唔怕炒嘅車仔主帥干地，同處危機而不自知嘅利物浦領隊高洛普，帥位亦一啲都唔穩陣。禮拜日英超四大「名牌」兩場波炮製12個入球，比賽水準唔高，但夠亂章，球迷過足癮。默西塞德郡嘅困局，筆者早已撰文，局面至今只有更劣，朗奴高文亂擴軍故然抵炒，但高洛普執教紅軍，亦愈嚟愈唔對路。
干地有料，排陣果敢，但同車仔高層關係轉差，加上衛冕英超近年已成不可能任務，大老闆阿巴郁手係遲早問題。高洛普嘅紅軍「前重後輕」係上季問題，沒有頂級防中撐場，中路防守遇快速反擊受巨壓，中堅必定孭鑊。依家佢教咗紅軍兩年零半個月共70場聯賽，每場平均跌到只攞1.79分，俾前任羅渣士頭兩年嘅1.91分同賓尼迪斯嘅1.84分，愈拋愈遠。高洛普話如果佢有份落場，熱刺入嘅第一球唔會失，實有諉過球員，不負責任之嫌；唔使理周中聯賽盃嘅利記，下戰要喺聯賽迎戰剛擊倒曼聯嘅哈特斯菲爾德，又睇吓佢有乜補漏妙計。
