曼城同利物浦今季單打獨鬥，其中一個致勝法門係近年大灑金錢強化防線；呢個夏天，睇怕英超其他列強會忙搶守將，但以紅魔曼聯最頭痛，下季唔易即時變身。英超好少似富咸咁冇眼光，升班後枉花逾億鎊擴軍，來屆即落返英冠。外界指英超七哥狼隊下季會有機會侵佔英超Big 6嘅地盤，小弟反而認為升班後翌季，激情減退；加上打法已被洞悉，除非簽到世界級球員，否則回落機會更大。如此一來財大嘅英超Big 6只會係洗牌，執個排位格局。六強中，已提早收工嘅曼聯最麻煩，除咗部分骨幹成員前途未卜外，佢哋今季聯賽失咗54球，仲差過水晶宮，中路守將5人，表現水準以下；包括史摩寧同菲爾鍾斯，費爵爺「遺物」、馬高斯盧祖係雲高爾喺14年世盃後相中，至於艾歷拜利及域陀連迪路夫係前帥摩佬嘅「精選」。
呢5將焗住留喺紅魔，難怪佢哋球探話怕阿積士新星中堅馬菲斯迪歷特，日後變肥仔，早勸曼聯咪掂。事實係條防線臃腫不堪，唔瘦身，點塞多一個呢？
