紅魔新帥破地獄
自費Sir榮休後，紅魔呢11年半以來，連看守領隊用過11人，最叻嘅「摩佬」同「坦克」攞過兩個盃賽冠軍，但長期活喺同市曼城嘅陰影之下，堂堂世上最偉大球會之一，超過十年冇再攞過英超冠軍。如果「生人都好多地獄」，曼聯上至高層下至球迷都會有咁嘅感受。主帥換完又換，個個揸弗人登場豪情壯語，結果全部敗部離開。
唔夠40歲，挾士砵亭霸氣到曼市嘅艾摩廉會點？冇人攞住水晶球，以往由葡超轉教英超，勁有摩佬，流嘅有當年由波圖過檔車路士嘅少帥波亞斯同前兩、三年由賓菲加轉教狼隊嘅般奴拿治。新帥總有蜜月期，好似白禮頓今季嘅少帥賀斯拿，場場唔同排陣，行家未捉到佢路，做下巨人殺手。艾摩廉接替工雲佬領紅魔嘅反彈浪，仲有勁敵曼城同阿仙奴正陷低潮，聯賽排緊第13位反彈水位大。但難題會係點樣處理「坦克」手下一堆荷甲子弟兵？令30萬英鎊周薪嘅射手福仔重生？同唔會場場波畀對手打開兩截，前後球員各自為戰？有機會教到曼聯已經賺晒，祝佢搭緊呢程係長途車。