英超容不下另一支小兵
英超季尾睇走勢係「6降3」，包尾修咸頓下周一作客鬥森林攞唔到3分，應要結束呢10季喺英超「先高後低」、曾兩度參加歐霸嘅風光，部署定下季落英冠「地獄」。修頓對上連續兩屆英超排15位後，前前帥哈辛赫圖自知帥危，其實今屆季初已同由當時啱啱喺曼城加盟嘅首席球探舒特斯(Joe Shields)，定好博一鋪大計，又說服到曼城哥帥肯放走4件青年軍過檔，成班新兵多係入貨價唔貴嘅年輕人，已知道呢支南軍嘅部署放眼將來。
可惜季初4戰搶得7分包括打敗車路士後，無以為繼，高層一見唔對路就騰雞，舒特斯話咁快去年10月尾被車仔狂人班主撬走；哈辛赫圖11月初被炒魷，球隊又淪為英超典型中下游分子玩法，由上至下不斷換帥換兵，冬窗簽入嘅前鋒又唔多啱用，冇乜起色。但隊波好似門將、愛爾蘭國腳巴辛奴、比利時中場新星羅美奧拉維亞同阿根廷攻中艾卡拿斯，全部上緊位；英超容不下除咗阿仙奴嘅青春班「兵」團，但呢班新星留得低踢英冠，隨時變成佢哋大放光芒嘅「天堂」。