俾人話係天才，喺呢個世代，係貶多於褒；以前俾利迷笑到面黃嘅前曼聯領隊「莫天才」，睇走勢，再發圍機會唔細。勤換領隊，成足球常態，但英超總係喜歡試新嘢，試唔掂又用番舊嗰班人接爛攤子。計埋入主「槌仔幫」嘅莫天才，仲有「學神」、「大Sam哥」同佩爾；呢班季中插入嘅舊領隊，輪住發威。
莫耶斯2002年開始教愛華頓，絕對係英超元老級波士，先揾硬漢子皮亞斯做助手，一剛一柔，高招之一。再針對球隊識攻唔識守嘅大問題，由縮後幾乎贏到「長勝軍」曼城後，隊波嚟料，近3場攞咗7分，棄赫特用阿祖安卡斯迪路打龍門、縮後打反擊，高招二。最勁係用「Double A」米查利安東尼奧同「醒番」嘅「臭馬」阿拿奧杜域打雙箭頭，棄「小豆」查維亞靴南迪斯。弱旅出射手，呢招係每支護級隊最渴求嘅靈藥。
韋斯咸今晚又喺盃仔碰阿仙奴，未必太在意；但之後快車期鬥紐卡素、般尼茅夫及西布朗幾支榜下游球隊，應該先係莫天才送俾球迷嘅最佳聖誕禮物。
