同級對決，精彩好多，只見英格蘭喺生死戰豁出去同克仔鬥攻15分鐘贏波，平時國際賽好少咁激。「三獅兵團」難得半年內兩進大賽四強，風光背後，好遺憾咁睇住國家隊未來希望拉舒福特獨憔悴。歐國聯總冠軍獎金逾千萬歐元，但最喜見嘅係每戰屬同級對決，對觀賞度及提升國家隊水平大有幫助，賽事注定成功過明年3月開始嘅歐國盃外圍賽。三獅兵團尾段全攻型恰到3日內連踢兩場硬仗嘅克羅地亞，表現其實一般，但修夫基麾下勝在球員鬥志好，後備攻兵充足，派到連格同迪利阿里入場谷尾段，唔係咁多球隊有咁厚嘅本錢。
自世盃4強出局後，英格蘭踢法冇太大改變，靠王牌哈利卡尼近門篤入奠勝，但英格蘭第二點攻擊實在太弱。「福仔」未被換走前，喺左路不斷死扭，有亮點得掌聲但合拍乏人；最後見佢好似有啲傷，頭也不回先返回更衣室，三獅兵團先展開絕地反勝一幕。喺國家隊失落，喺曼聯又係安放左路，冇得踢箭頭，更徘徊正選及後備之間，究竟呢兩、三年，誰負了福仔？