17歲仔活特本(Ben Woodburn)一登場，就為「赤龍」威爾斯立大功，即想到領隊高文嘅膽色、利物浦波士高洛普嘅厲害。世界盃外圍賽打得火熱，但實際上競爭意味不濃，連法國都喺主場悶和盧森堡，強隊間中hea踢下，唔會覺得自己羞家。要花精神喺「世盃外」，都要揀啲戰意強嘅比賽留意。大不列顛球隊另加愛爾蘭，除「大佬」英格蘭好大機會直接出線之外，其他全排緊喺二、三位，跌跌蕩蕩。自細由紅軍培育嘅活特本，因為祖父係威爾斯人，一心一意為威爾斯由小國腳打起，從未諗過過檔英格蘭。如今高文喺關鍵時刻，夠膽俾小伙子初次後備出場，即射死奧地利；呢位被譽為「新加里夫巴利」嘅利物浦前鋒，話唔埋今晚作客摩爾多瓦，又有機會出場立功。
高文一向果敢用新人，譽滿英國球壇；賓仔一出場即揚名，亦反映唔肯借佢出去嘅母會利物浦，珍惜同培育本土球員，難怪連阿歷士張伯倫都肯計平啲人工，令人意外地由阿仙奴過埋嚟。紅軍後備前鋒，仲有位今屆加盟嘅英格蘭明日之星蘇蘭基，高洛普麾下，紅軍深未見底。