接手「患重病」嘅新特蘭，高文或者係救世心態發作。高文去年帶領「紅龍」威爾斯國家隊殺入歐國盃4強，威風凜凜；啱啱又只係差一步，幫唔到隊波攞世盃外圍賽附加賽一席，有晒交代。呢位低調嘅威爾斯人布陣靈活，肯用新人，兩大孭飛主將加里夫巴利同艾朗藍斯仲咁當打，隊波前景唔比其他英倫三島球隊差。
可能「紅龍」無得飛去俄羅斯，高文嫌嚟緊大半年好悶，見到英冠包尾嘅大會新特蘭有offer，即刻飛撲上東北接任。睇番高文嘅履歷，球員時代幫富咸由第三級別殺到上英超；2012年前領隊史必自殺身亡，佢又接手威爾斯，每有危難都能助球隊由低谷上高山，今鋪又想向高難度挑戰。但「病黑貓」破緊國內紀錄，連續20場主場不勝，衰到貼地；英冠又素有地獄聯賽之稱，跌咗落去，多數返唔到上英超，只要高文肯等一等，其實好有機會教到英超嘅中、小型班。
「莫天才」啱啱上任教韋斯咸即作客食兩蛋，今晚高文帶新特蘭作客英冠前列嘅阿士東維拉，即做炮灰機會一樣濃。