英超球隊唔重視足總盃屬正路，因為賽期安排總係緊接之後英超開快車，終極獎賞亦只係下季歐霸盃席位。不過，千祈咪輸得太肉酸，否則隨時好似愛華頓領隊馬高施華咁，份工搖搖欲墜。英足盃打完第四圈，剩番5隊英超肯定晉級16強，仲有兩隊等重賽，擺明唔想要多過以前成日話氹仔浸蛟龍，但呢種心態唔似可以代自95年起冇捧過盃嘅愛華頓解畫。被視為英超Big Six之外最強嘅「拖肥糖」，上周末排強陣作客英冠護級球隊米禾爾，照被絕殺出局；隊波過去兩個夏天，共花咗超過2億英鎊擴軍，季前又終等到馬高施華埋位，但依家排緊第11位，落後第六位曼聯14分，莫說上六，搶七都唔易。
愛華頓自從英格蘭首席門將比克福特，喺上月初同市打吡鬥利物浦發波瘟起，急轉直下；後防人腳好強但應付死球極差，前線嘅巴西射手李察利臣，又同上季踢屈福特一樣，入冬起入球量大跌。英超急求有功炒領隊當閒事，拖肥糖今晚作客英超包尾嘅哈特斯菲爾德，冇失分藉口，否則恐怕馬高施華未必過到豬年。