利物浦3場不勝，愛華頓更4連敗1球不入，兩支默西塞德郡大會，黯然無光；周中戰「雞肋」英聯盃，「紅藍」兩軍唯有去盡止瀉。
利物浦嘅高強度壓迫踢法，勝在悅目，但冇一位好門將、好防中坐鎮，防線受巨壓，唔能夠全怪常被球迷批評嘅中堅「兩嚿雲」洛夫雲及卡拉雲。領隊高洛普排陣似星期美點，連續4場輪換門將，兼「鐵膽」祖爾麥迪比輪住拍兩嚿雲，試極唔掂，領隊係咪應負更大責任？今晚喺英聯盃作客李斯特城，紅軍當然唔易踢；不過，英聯盃雖然獎金奀，攞冠軍亦只係入歐霸，對強隊意義唔大，但翻查近3季決賽隊伍，全部喺當屆有份參加歐洲兩盃嘅分組賽，證明列強唔怕喺季初應付3面戰線。李斯特城正常會收起常規攻擊主力，包括占美華迪及馬列斯，突擊威力頓減，紅軍有機會以快制快。
愛華頓領隊朗奴高文壓力更大，用1.4億鎊擴軍，替補盧卡古，但球隊頭輕身重，前線冇補強，唔夠火力；好在聽晚喺第三圈迎戰落咗英冠、排緊尾四嘅新特蘭，睇怕愛華頓派一班生牯仔落場捉「貓」無難度，大勝可期。